លោកឧកញ៉ា ឃុន សៀ ត្រូវបានប្រជាពលរដ្ឋនៅភូមិអរិយក្សត្រ ខេត្តកណ្ដាល រិះគន់ថា ឈូសឆាយធ្វើផ្លូវចូលដីរបស់ពួកគាត់
21-May-2019 | ដោយ ពលមនសិការ
កណ្ដាល៖ លោកឧកញ៉ា ឃុន សៀ ត្រូវបានប្រជាពលរដ្ឋដែលមានផ្ទៃដីអាស្រ័យផលនៅឃុំអរិយក្សត្រ ស្រុកល្វាឯម ខេត្តកណ្ដាល ជាប់ទន្លេមេគង្គ រិះគន់ថាបានប្រើកូនចៅយកគ្រឿងចក្រ និងអាប៊ុល ឈូសឆាយធ្វើផ្លូវ រំលោភចូលដីកម្មសិទ្ធិរបស់ពួកគាត់ កាលពីព្រឹកថ្ងៃទី២០ ខែឧសភា ឆ្នាំ២០១៩។
ប្រជាពលរដ្ឋដែលរងផលប៉ះពាល់បានឱ្យដឹងថាក្នុងប្រតិបត្តិការឈូសឆាយដីប្រជាពលរដ្ឋនៅតំបន់ខាងលើរបស់ក្រុមហ៊ុន លោកឧកញ៉ា ឃុន សៀ នោះមានកម្លាំងប្រដាប់អាវុធដូចជាកម្លាំងកងរាជអាវុធហត្ថ និងកម្លាំងនគរបាលផងដែរ ដើម្បីការពារការរារាំងពីសំណាក់ប្រជាពលរដ្ឋនៅតំបន់នោះ។
សេចក្តីរាយការណ៍មួយបានឱ្យដឹងថា ក្រុមហ៊ុនឧកញ៉ា ឃុន សៀ ទទួលបានសិទ្ធិវិនិយោគលើដីតំបន់ឃុំអរិយក្សត្រនេះ ប៉ុន្ដែការឈូសឆាយធ្វើផ្លូវ គឺបានរំលោភចូលដីកម្មសិទ្ធិរបស់ប្រជាពលរដ្ឋ ដែលតម្រូវឱ្យអាជ្ញាធរគួរមានដំណោះស្រាយជាមុនសិន។ ពាក់ព័ន្ធករណីនេះ ស.ជ.ណ របស់ទីស្ដីការគណៈរដ្ឋមន្ដ្រី ដែលបានសម្រេចឱ្យក្រុមហ៊ុន ឃុន សៀ មានសិទ្ធិជួលដីរបស់រដ្ឋប្រមាណ៧០ហិតា នៅភូមិអរិយក្សត្រ និងភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្ដាល ក្នុងរយៈពេល៥០ឆ្នាំ ។ ប៉ុន្ដែក្រុមហ៊ុន ត្រូវដោះស្រាយ ជាមួយប្រជាពលរដ្ឋទាំងអស់ ដែលអាស្រ័យផលដាំដំណាំផ្សេងៗលើដីទាំងនេះ។
ពាក់ព័ន្ធការចោទប្រកាន់ខាងលើ សារព័ត៌មានយើងមិនអាចសុំការបកស្រាយពីលោកឧញ៉ា ឃុន សៀ បានទេនៅរសៀលថ្ងៃទី២១ ខែឧសភា ឆ្នាំ២០១៩នេះ។ ដោយឡែកលោក ម៉ៅ ភិរុណ អភិបាលខេត្តកណ្តាលក៏មិនអាចសុំការបកស្រាយបានដែរនៅរសៀលថ្ងៃនេះ លើករណីឈូសឆាយធ្វើផ្លូវចូលដីរបស់ប្រជាពលរដ្ឋ ដោយហៅទូស័ព្ទតេចូល មិនមានអ្នកទទួល៕
ចំនួនអ្នកទស្សនា
- ថ្ងៃនេះ1371
- ម្សិលមិញ6261
- សប្តាហ៍នេះ19751
- ខែនេះ134901
- ឆ្នាំនេះ134901
- សរុប20577357